
第一世噶玛巴教言集1KM24སྒྲོལ་མ་ལྷ་ལྔའི་སྐོར་ལས་སྒྲོལ་མ་ལྷ་ལྔའི་རྒྱ་གཞུང་བཞུགས་སོ། །
1-2-174b
༄༅། །སྒྲོལ་མ་ལྷ་ལྔའི་སྐོར་ལས་སྒྲོལ་མ་ལྷ་ལྔའི་རྒྱ་གཞུང་བཞུགས་སོ། །
༄༅། །སྒྲོལ་མ་ལྷ་ལྔའི་སྐོར་ལས་སྒྲོལ་མ་ལྷ་ལྔའི་རྒྱ་གཞུང་བཞུགས་སོ། །རྒྱ་གར་སྐད་དུ། ཁ་དི་ར་མ་ཎི་ཏཱ་རེ་སཱ་དྷ་ན། བོད་སྐད་དུ། སེང་ལྡེང་ནགས་ཀྱི་སྒྲོལ་མའི་སྒྲུབ་ཐབས། སེང་ལྡེང་ནགས་ཀྱི་སྒྲོལ་མ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ས་གཞི་ལེགས་ཤིང་མཉམ་ལ་གཙང་ཞིང་ཡིད་དགའ་བའི་མེ་ཏོག་སྣ་ཚོགས་པས་བརྒྱན་པའི་དབེན་པའི་ས་ཕྱོགས་སུ་སྟན་བདེ་བ་ལ་འདུག་སྟེ། རང་གི་སྙིང་གར་ཟླ་
1-2-175a
༄༅། །བ་ལ་ཏཾ་ཡིག་དུར་བའི་མེ་ཏོག་ལྟ་བུ་འོད་ཟེར་རྣམ་ལྔ་འཕྲོ་བར་བལྟའོ། །དེ་ལས་འོད་ཟེར་རྣམ་པ་ལྔ་འཕྲོས་པས་འགྲོ་བ་ཐམས་ཅད་ཀྱི་སྡིག་སྒྲིབ་སྦྱངས་ཏེ་སླར་དེ་ཉིད་ལ་བསྡུའོ། །དེ་ནས་རང་གི་སྙིང་གར་ཏཾ་ལས་འོད་ཟེར་འཕྲོས་པས་འོག་མིན་གྱི་གནས་ནས། ཇོ་མོ་སྒྲོལ་མ་མདུན་གྱི་ནམ་མཁའ་ལ་སྤྱན་དྲངས་ཏེ་གསལ་བར་ལྟས་ཏེ། བླ་ན་མེད་པའི་མཆོད་པ་བདུན་གྱིས་མཆོད་པར་བྱའོ། །དེ་ནས་སྡིག་པ་བཤགས་པ་ལ་སོགས་པ་དང་། བསོད་ནམས་ལ་རྗེས་སུ་ཡི་རང་བ་དང་། བསོད་ནམས་ཡོངས་སུ་བསྔོ་བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་ལམ་བསྟན་པ་དང་། བདག་ཉིད་འབུལ་བ་ལ་སོགས་པ་བྱས་ལ། བྱམས་པ་དང་སྙིང་རྗེ་དགའ་བ་བཏང་སྙོམས་རིམ་པ་བཞིན་བསྒོམ་པར་བྱའོ། །དེ་ནས་རང་བཞིན་གྱིས་རྣམ་པར་དག་པ་འདི་ལན་གསུམ་བརྗོད་པར་བྱའོ། །ཨོཾ་སྭ་བྷཱ་ཝ་ཤུདྡྷ་སརྦ་དྷརྨཿསྭ་བྷཱ་ཝ་ཤུདྡྷོ ྅ཧཾ། ཨོཾ་ཤཱུ་ནྱ་ཏ་ཛྷཱ་ན་བཛྲ་སྭ་བྷཱ་ཝ་ཨཱཏྨ་ཀོ ྅ཧཾ། ཞེས་བརྗོད་པས། བདག་གཞན་གྱི་དངོས་པོ་ཐམས་ཅད་སྟོང་པ་ཉིད་དུ་བསྒོམ་པར་བྱའོ། །དེ་ནས་སྔོན་གྱི་སྨོན་ལམ་རྗེས་སུ་དྲན་པས། ནམ་མཁའི་ཁམས་སུ་པཾ་ཡིག་ལྗང་གུ་ཡོངས་སུ་གྱུར་པ་ལས། སྣ་ཚོགས་པད་མའི་ལྟེ་བ་ལ་ཨ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གྱི་སྟེང་དུ་དུར་བའི་མདོག་ལྟ་བུའི་ཏཾ་འོད་ཟེར་སྣ་ཚོགས་
1-2-175b
དང་ལྡན་པར་བསྒོམ། དེ་ལས་འོད་ཟེར་འཕྲོས་པས་ཕྱོགས་བཅུ་ན་བཞུགས་པའི་སངས་རྒྱས་བཀུག་སྟེ་དེ་ཉིད་ལ་ཞུགས་པར་བསྒོམ་མོ། །དེ་ནས་འོད་ཟེར་ཐམས་ཅད་ཕྱོགས་གཅིག་ཏུ་གྱུར་པ་ལས། སྐད་ཅིག་གིས་རྗེ་བཙུན་མ་སྒྲོལ་མར་བྱས་ཏེ། སྐུ་མདོག་ལྗང་གུ་ཞལ་གཅིག་ཕྱག་གཉིས་མ། ཡིད་དགའ་བའི་རྒྱན་ཐམས་ཅད་ཀྱིས་བརྒྱན་པ། ཕྱག་གཡོན་ན་ཨུཏྤ་ལ་བསྣམས་པ། ཕྱག་གཡས་པས་བ་པས་བདུད་རྩི་འཛག་པའི་མཆོག་སྦྱིན་མཛད་པ། སྣ་ཚོགས་པདྨའི་སྟེང་དུ་ཟླ་བ་ལ་ཞབས་གཡས་བརྐྱང་པའི་སྐྱིལ་ཀྲུང་ཕྱེད་པས་བཞུགས་པའོ། །དེའི་མདུན་ཕྱོགས་སུ་མྱ་ངན་མེད་པའི་འོད་ཟེར་ཅན་སྐུ་མདོག་སེར་མོ་རིན་པོ་ཆེ་སྣ་ཚོགས་ཀྱི་དབུ་རྒྱན་ཅན། རྒྱན་ཐམས་ཅད་ཀྱིས་བརྒྱན་པ་དར་སྣ་ཚོགས་ཀྱི་འང་སྐེ་རགས་དང་ཤམ་ཐབས་བྱས་པ། ཕྱག་གཡས་ན་རྡོ་རྗེ་བསྣམས་པ། གཡོན་པས་མྱ་ངན་མེད་པའི་ཤིང་གི་ཡལ་ག་བསྣམས་པ་ཉེ་བར་བཞུགས་པའོ། །དེའི་གཡོན་ཕྱོགས་སུ་རལ་གཅིག་མ་མིའུ་ཐུང་གི་གཟུགས་ཅན་སྐུ་མདོག་ནག་མོ་སྟག་གི་ལྤགས་པའི་ན་བཟའ་མནབས་པ། སྤྱན་གསུམ་པ་མཆེ་བ་གཙིགས་པའི་ཞལ། སྐྲ་སེར་པོ་འབར་ཞིང་གྱེན་ལ་བརྗེས་པ་ཞལ་བསྟན་ལུགས། ཕྱག་གཉིས་ཀྱིས་གྲི་གུག་དང་ཐོད་པ་བསྣམས་པ་ཉེ་བར་བཞུགས་པའོ། །ཡང་རྨ་བྱ་ཆེན་མོ་སྐུ་མདོག་སེར་མོ་རྒྱན་ཐམས་ཅད་ཀྱིས་བརྒྱན་པའོ། །ཕྱག་གཡས་པ་རྔ་ཡབ་
1-2-176a
༄༅། །དཀར་པོ་གསེར་གྱི་ཡུ་བ་ཅན་བསྣམས་པ། གཡོན་པས་རྨ་བྱའི་མདོངས་བསྣམས་པ་ཉེ་བར་བཞུགས་པའོ། །ཡང་དེའི་རྒྱབ་ཕྱོགས་སུ་དུག་སེལ་མ་སྐུ་མདོག་ལྗང་གུ་ཕྱག་གཡས་པས་མཆོག་སྦྱིན། གཡོན་པས་སྦྲུལ་དཀར་པོ་ཐུགས་ཀར་བསྣམས་པ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ་ཉེ་བར་བཞུགས་བཞི་པོ་འདི་ཟླ་བ་ལ་སྐད་ཅིག་གིས་པའོ། །གཞན་ཡང་དེ་རྣམས་ལ་འཁོར་ལྷ་དང་ལྷ་མ་ཡིན་གྱིས་བསྐོར་བར་བསྒོམ་པར་བྱའོ། །དོན་ཡེ་ཤེས་པ་གཞུག་དབང་བསྐུར་ཡི་གེ་གསུམ་གྱིས་བྱིན་གྱིས་བརླབས་ཡོད་གྲུབ་པས་དབུ་རྒྱན་པའོ། །དེ་ནས་རང་གི་སྙིང་གའི་ས་བོན་ལས་སངས་རྒྱས་ཀྱི་སྤྲིན་སྤྲོ་བར་བསམ་མོ། །དེ་ལྟར་རྣལ་འབྱོར་པ་བསྒོམས་པས་སྐྱོ་ན། རང་གི་སྙིང་གར་ཨུཏྤ་ལའི་སྟེང་དུ་ཟླ་བའི་དཀྱིལ་འཁོར་ལ་སྔགས་མུ་ཏིག་གི་ཕྲེང་བ་ལྟར་དཀར་པོ་བལྟས་ལ་བཟླས་པ་བྱ་སྟེ། བཟླས་པའི་སྔགས་ནི། ཨོཾ་ཏཱ་རེ་ཏུཏྟ་རེ་ཏུ་རེ་སྭཱ་ཧཱ། དེ་ནས་ལྡང་པར་འདོད་ན། སྔོན་བཞིན་དུ་མཆོད་པ་དང་བསྟོད་པ་བྱ། རང་གི་དགེ་བའི་རྩ་བ་རྣམས་བསྔོས་ལ། ཨོཾ་ཨ་མྲྀ་ཏ་བྷ། ཞེས་བརྗོད་པས། སེམས་ཅན་ཐམས་ཅད་ཀྱི་དོན་དང་། དངོས་གྲུབ་ཐོབ་པར་བསམ་ལ། མུཿ ཞེས་བརྗོད་པས་སངས་རྒྱས་ཀྱི་ཞིང་དུ་གཤེགས་པར་བསམ་ཞིང་། སླར་ཡང་སེམས་ཅན་གྱི་དོན་དུ་འབྱོན་པར་གསོལ་བ་གདབ་ལ། དེ་ནས་ཇོ་མོ་སྒྲོལ་མའི་གཟུགས་ཀྱིས་ཅི་བདེ་བར་སྤྱོད་ལམ་བྱའོ། །མཆོད་
1-2-176b
པའི་སྔགས་ནི། ༀ་ཨཱ༔ཧཱུྃ་ཏཱ་རེ་ཡེ་བཛྲ་པུཥྤེ་ཡེ་ཧཱུྃ་སྭཱ་ཧཱ། དེ་བཞིན་དུ་བདུག་སྤོས་མ་དང་། མར་མེ་མ་དང་། དྲི་དང་། ཞལ་ཟས་རྣམས་འབུལ་བར་བྱའོ། །སེང་ལྡེང་ནགས་ཀྱི་སྒྲོལ་མའི་སྒྲུབ་ཐབས། སློབ་དཔོན་ཀླུ་སྒྲུབ་ཀྱིས་མཛད་པ་རྫོགས་སོ། །རྣམ་པར་སྣང་མཛད་རྡོ་རྗེས་རང་འགྱུར་དུ་བསྒྱུར་བའོ། །འདིའི་རྒྱུད་པ་ནི། སློབ་དཔོན་ཀླུ་སྒྲུབ། ཀླུའི་བྱང་ཆུབ། དགའ་རབ་རྡོ་རྗེ། རྡོ་རྗེ་གདན་པ། ཨ་བྷ་ཡ་ཀ་ར། བཻ་རོ་ཙ་ན། དུས་གསུམ་མཁྱེན་པ། དབང་ཕྱུག་རྡོ་རྗེ། སློབ་དཔོན་ཡང་དགོན་པ། སློབ་དཔོན་ཁམས་པ། འཇམ་དཔལ་སེང་གེ །ཤར་དགོན་པ། མཁན་པོ་ཀུན་དགའ་འོད་ཟེར། བསོད་ནམས་དཔལ། དེས་བདག་ལའོ།། །།


目录
སྒྲོལ་མ་ལྷ་ལྔའི་སྐོར་ལས་སྒྲོལ་མ་ལྷ་ལྔའི་རྒྱ་གཞུང་བཞུགས་སོ། །